હસું છું એટલે માની ન લેશો કે સુખી છું હું,
રડી શક્તો નથી એનું મને દુઃખ છે, દુઃખી છું હું;
દબાવીને હું બેઠો છું જીવનના કારમા ઘાવો,
ગમે ત્યારે ફાટી જાઉં એ જવાળામુખી છું હું.
- શેખાદમ આબુવાલા
હસું છું એટલે માની ન લેશો કે સુખી છું હું
October 3, 2008 at 5:07 am (ગઝલો)
Tags: gazals, gujarati gazal, shekhadam aabuvala, sher, poet, gazalkar, shayari
દર્દ આપ મુજને એવું કે ત્યાગી શકાય ના
September 17, 2008 at 5:39 am (ગઝલો)
Tags: gazals, gujarati gazal, shekhadam aabuvala
દર્દ આપ મુજને એવું કે ત્યાગી શકાય ના,
ઊંઘી શકાય ના અને જાગી શકાય ના.
એ બેવફાનો પ્રેમ મળે એ રીતે મને,
ઈચ્છા તો હોય ખૂબ ને માંગી શકાય ના.
આપે તો આપ સ્વર્ગ મને એ પ્રકારનું,
હું પાપ પણ કરું અને ભાગી શકાય ના.
એવું મિલન ન ભાગ્યમાં ‘આદમ’ કદી મળે,
એને મળું અને ગળે લાગી શકાય ના.
-શેખાદમ આબુવાલા
તું એક ગુલાબી સપનું છે
August 20, 2008 at 4:16 am (કવિતા)
Tags: gujarati kavita, gujarati poems, kavya, poem, shayar, shekhadam aabuvala, sher
તું એક ગુલાબી સપનું છે
હું એક મજાનીં નીંદર છું.
ના વીતે રાત જવાનીની
તે માટે હું પણ તત્પર છું.
ગોતી જો શકે તો લે ગોતી
મોતીના સ્વરૂપે છે જ્યોતિ
ઓ હંસ બનીને ઊડનારા
હું તારું માનસરોવર છું.
શાંત અને ગંભીર ભલે
શરમાળ છે મારાં નીર ભલે
ઓ પૂનમ ઘૂંઘટ ખોલ જરા
હું એ જ છલકતો સાગર છું.
કૈલાસનો સચવાયે વૈભવ
ગંગાનું વધી જાશે ગૌરવ
તું આવ ઉમાનું રૂપ ધરી
ને જો કે હું કેવો સુંદર છું.
સંવાદ નથી શોભા એની છે
મૌન પ્રતિષ્ઠા બન્નેની
તું પ્રશ્ન છે મારે પ્રીતિનો
હું તારા રૂપનો ઉત્તર છું.
-શેખાદમ આબુવાલા
ગાંધી
July 28, 2008 at 5:47 am (ગઝલો)
Tags: gujarati gazal, shayari, shekhadam aabuvala, sher
ગાંધી
કેવો તું કિંમતી હતો સસ્તો બની ગયો
બનવું હતું નહીં ને શિરસ્તો બની ગયો
ગાંધી તને ખબર છે કે તારું થયું છે શું?
ખુરશી સુધી જવાનો તું રસ્તો બની ગયો.
- શેખાદમ આબુવાલા
થઈ ગઈ
June 26, 2008 at 9:22 am (ગઝલો)
Tags: gazal, gujarati gazals, poet, shayar, shayari, shekhadam aabuvala
આ દેશને માટે હિંસા એક વ્યાધિ થઈ ગઈ
ચાહી અમે નો’તી છતાં કેવી ઉપાધિ થઈ ગઈ
માર્યા - પછી બાળ્યા - પછી દાટ્યા - પછી ફૂલો ધર્યા
ચાલો થયું તે થઈ ગયું સુંદર સમાધિ થઈ ગઈ
- શેખાદમ આબુવાલા
મોંઘી પડી
June 18, 2008 at 5:10 am (ગઝલો)
Tags: gazalkar, gazals, gujarati poet, shekhadam aabuvala
પ્યારની રંગીન લત મોંઘી પડી, આગ સાથેની રમત મોંઘી પડી..
જીતતાં જીતાઈ ગૈ બાજી બધી,એક આ દીલની લડલ મોંઘી પડી.
જીંદગીના રંગ સૌ રુઠી ગયા..,બુધ્ધીની આ આવડત મોંઘી પડી.
બાગમાં આવો,રહો,પણ બે ઘડી,માળીની બસ આ શરત મોંઘી પડી.
પ્રાણ લૈ આવ્યા અને દૈને ગયા,તારી કીમત ઓ જગત મોંઘી પડી…
- શેખાદમ આબુવાલા
તારી પાસે રામ છે
June 10, 2008 at 2:43 am (ગઝલો)
Tags: gazal, sayari, shekhadam aabuvala, sher
તારી પાસે રામ છે
મારી પાસે જામ છે
અર્થ શો વિખવાદનો
બેઉને આરામ છે !
- શેખાદમ આબુવાલા
અમને નાખો જિંદગીની આગમાં
June 4, 2008 at 4:35 am (ગઝલો)
Tags: gazals, gujarati poet, shekhadam aabuvala
અમને નાખો જિંદગીની આગમાં
આગને પણ ફેરવીશું બાગમાં
સર કરીશું આખરે સૌ મોરચા
મોતને પણ આવવા દો લાગમાં.
મરીશું તો અમે ખુદ મોત માટે જાન થઈ જાશું
રહીશું બાગમાં તો આગનો સામાન થઈ જાશું
ઉછાળા મારીને અમને ન પાછા વાળ ઓ સાગર
કિનારો આવશે તો ખુદ અમે તોફાન થઈ જાશું.
- શેખાદમ આબુવાલા
હું નયનનું નીર છું
June 2, 2008 at 4:29 am (ગઝલો)
Tags: gazals, gujarati gazal, poet, shekhadam aabuvala
હું નયનનું નીર છું
પ્રેમનું તકદીર છું
ખેંચશો - હારી જશો
દ્રૌપદીનું ચીર છું
અર્જુને પૂછ્યું મને
રે તું કોનું તીર છું
જે નજર આવે નહીં
તેની હું તસ્વીર છું
પાત્ર લાવો હેમનું
હું સિંહણનું ક્ષીર છું
જન્મના ફેરાની હું
તૂટતી ઝંજીર છું
જાય છે આદમ? ભલે!
દુ:ખ નથી-દિલગીર છું
- શેખાદમ આબુવાલા
ખાળ તારી આંખડીના નીરને
May 22, 2008 at 5:00 am (ગઝલો)
Tags: gazal, gujarati gazals, shekhadam aabuvala
ખાળ તારી આંખડીના નીરને
સંકટોમાં આ ન છાજે વીરને;
એને ઠોકર મારીને રસ્તે લગાવ,
ક્યાં સુધી પંપાળશે તકદીરને ?
- શેખાદમ આબુવાલા
