ભગવાન ની વેદના

સદીઓ થી શેષ –શૈયા પર સુતેલો તું થાકી તો જતો હશે,
તને પણ અમારી જેમ જીવવાનો કદિ અભરખો તો થતો હશે,

દુ:ખો ની યે આદત પાડવાની અમારી આવડત(!) જોઇ,
પીડા વિહોણી તારી જીંદગી પર તને અફસોસ તો થતો હશે.

દૂધ નુ સપનુ ય જોતા ડરતા ગરીબો ને જોઈ ને,
સામે બળતા ઘી ના દીવા ભેગો તું પણ બળતો તો હશે !

મંદિર બહાર સૂકા રોટલા ને ય ટળવળતા બાળકો ભેગો,
તને ધરાવાયેલા છ્પ્પન ભોગો ને જોઇ ; તું ય ટળવળતો તો હશે .

સામે ની હાટ માં ભીંજાતા લાચાર નિર્દોષ બાળપણ ને જોઈ, તારા
શિખરબધ્ધ મંદિર ને સોના ના છત્તર નીચે તું પણ પલળતો તો હશે !

તારા જ નામે, તને છેતરી, માણસ ને માણસ સાથે લડાવતા,તારા
ધાર્મિકો (!) ને જોઇ; તું ”બેચ ફેઇલ” ગયા નો બળાપો તો કાઢતો હશે.

આવા સંવેદનાવિહીન ને બુઠ્ઠા અમારા હૈયાઓ જોઇને જ ,
કદાચ કળીયુગ માં જીવવાનો પ્રોગ્રામ તું માંડી વાળતો હશે !!

– ચિંતન પટેલ

Advertisements

જીવનપથ

દૂર મજલ છે, પથ વિકલ છે, સાથિ નથી કોઇ સાથમાં,
ઘર સુરક્ષિત, માર્ગ અનિશ્ચિત, ભરોસો છે માત્ર જાતમા,
હાર –જીત તું શીદને વિચારે? બસ, ચાલવું તારા હાથમાં !

નસીબ છે તારું, જીવન તારું, લોકો ક્યાંથી કળી શકે ,
પોતે નથી ચળી પણ શકતા, ગ્રહો તને ક્યાંથી નડી શકે.
શક્ય બદલવી તે રેખાઓ છે; જે અંકિત તારા હાથ માં!

કાને ન ધર તુ સ્તુતિ-નિંદા ને, ફેંક ઉખાડી વિટપ શંકા ને,
સૂણી લે પ્યારો આતમ ઇશારો, ફરી જશે તુજ જીવન કિનારો,
નાવ ભલે કરતાર ની હો, હલેસાં તારા હાથ માં !

અંતરે તુ ઇશને રાખ, મરતા-મરતા જીવતો નહી,
સ્વપ્ના જો, આકાંક્ષા રાખ , ભય થી છળી મરતો નહી,
સામે આખી દુનિયા આખી ભલે હો, જીત તારા હાથ માં !!!

– ચિંતન પટેલ

ઇશ્વર ને આવી લક્ઝરી નથી હોતી !

દુખી થવું તો અધિક્રુત હક છે મનુષ્યો નો,
ઇશ્વર ને આવી લક્ઝરી નથી હોતી !

દર્દ ભરી ક્ષણ શ્રેષ્ઠ્તમ હિસ્સો છે જીવન નો,
માત્ર સુખ થી લદાયેલા જીવનમાં એ ખુમારી નથી હોતી.

મજા હોય છે જેવી સંઘર્ષ ના સૂકા રોટલા માં ; પ્રભુ !
ધરી દેવાયેલા છપ્પન ભોગ માં એવી કરારી નથી હોતી .

માત્ર સુખ ની વાંછના ; નિશાની છે કાયરો ની,
બહાદુરો ને તો આવી બીમારી નથી હોતી !

દરરોજ માંગવુ ને મળી જાય ; એ સ્થિતિ જ મોત છે,
આવી પડેલુ જીવી લેવાની દશા , આટલી ગોઝારી નથી હોતી !

– ચિંતન પટેલ

લખી દે !!

ધીરી સી આંચે તો ન પરખાશે કાંચન
પથ પર અગન આજીવન તું લખી દે !!

શું કરું સનાતન ઘૂઘવાટ સાગર સમો ?
વહેવું, અથડાવું છ્તાં ખળખળ હસવું લખી દે !!

ગલહાર થઇ ચળકવું ન પોસાષે વર્ષો
તવ ચરણે મહેકવું દિવસભર નું લખી દે !!

શું થયું જો ઉર્ધ્વગમન નિત દીપશીખા નું ન હો,
પતન તો પતન ; પણ નદી સરીખુ લખી દે !!

ટુકડે ટુકડે જીવી તો ન નીકળશે જીંદગી,
રેતઘડી શું ક્ષણે ક્ષણ નું સાર્થક સરકવું લખી દે !!

– ચિંતન પટેલ